السؤال الأول : كلمنا عن نفسك ؟
أكتر سؤال مشهور ولازم تتسأله في اي انتيرفيو , ولازم تكون مجهز الاجابة وخلى بالك من الاجابات المكررة والمملة , ممكن تتكلم عن تدرجك الوظيفي من أول وظيفة لأخر وظيفة لحد ما وصلت للانترفيو
السؤال الثاني : لماذا تركت وظيفتك السابقة ؟ (سؤال رخم جدا طبعا بس لازم تتسأله )
خلى بالك من الخطأ الشائع ( انك تتكلم عن مشكلة حصلت في الشغل أو تشتكي من مديرك أو الشركة اللي كنت فيها )
يعنى ممكن تتكلم عن طموحاتك وانك هتقدر تضيف للشركة الجديدة والشغل القديم مش بيرضي طموحك وكده
وانك دايما بتدور على الفرص المميزة
السؤال الثالت : ايه خبرتك في المجال دا ؟
طبعا لو عندك خبرة حلو خالص , اتكلم بقى عن الكورسات اللى اخدتها ,
طيب لو مااخدتش اي كوروسات ؟
متقلقلش اتكلم عن حاجات قريبة من المجال ( يعني لو مثلا الوظيفة مدير علاقات عامة تقول انك بتعرف تكسب الاشخاص وتكون علاقات مع الناس وتعرف نقنع العميل وتكسب ثقته )
السؤال الرابع : هل تعتبر نفسك ناجح ؟
طبعا لازم الاجابة تكون نعم وبثقة كمان وبعدين ابتدى اشرح ان عندك اهداف في حياتك وحققت بعضها وزي ايه
السؤال الخامس : شركاءك في العمل رايهم ايه فيك ؟
طبعا تكون مجهز بيان ولا جملتين من زملائك (يعنى مثلا فلان كان بيقول عنى انى اكتر موظف مجتهد عرفه في حياته)
السؤال السادس : تعرف ايه عن شركتنا ؟
لازم تكون عامل سيرش كويس جدا عن الشركة ( ابتدوا ازاي ووصلوا لايه وايه المشروعات الحالية وانجازاتهم و الأهداف الحالية للشركة)
السؤال السابع : عملت ايه علشان تحسن خبرتك في الفترة الأخيرة ؟
مافيش حد في حياته كلها ماخدش كورسات لغة , كمبويوتر , تنمية بشرية , اتكلم عنها
السؤال الثامن : انت مقدم على اي وظيفة تانية ؟
( بلاش كدب )
خليك صريح بس عدى الموضوع بسرعة جدا , وارجع اتكلم عن طموحاتك وانك ممكن تضيف للشركة
السؤال التاسع : ليه عايز تشتغل معانا ( في شركتنا)؟
الموضوع دا مرتبط بالسيرش اللى انت عامله عن الشركة , اكيد عاوز تشتغل فيها لانها شركة ناجحة وتناسب طموحاتك واربط دا باهدافك على المدى البعيد
السؤال العاشر : تعرف اي حد بيشتغل معانا ؟
مش عارفة بصراحة تتصرف ازاي بس اكيد مش هتقول طبعا... والا( مبرووووووووك عليك ضمنت الوظيفة )
السؤال الحادي عشر : عاوز مرتب كام ( سؤووووووال )
لعبة صغيرة هتخسر الوظيفة لو جاوبت ع السؤال , الحل هو التزويييييييغ ف الاجابة ( مثلا قول دا سؤال صعب جدا )
(ممكن اعرف الرينج بتاع الوظيفة) ( أو دا يعتمد على الوظيفة نفسها )
السؤال الثاني عشر : بتعرف تشغل ك team ?
اكييييييييييد بعرف( جاوب بثقة وبسرعة مع ذكر مثال )
السؤال الثالث عشر: تتوقع الفترة الي هتشتغل معانا اد ايه ؟
مش ينفع تقول وقت محدد والا معناها انك خلاص اتوظفت ودا غلط ولو ناوى فعلا تسيب الشغل بعد فترة بردوا مش تقول وقت معين ,
الاجابة : اتمنى تكون فترة طويلة أو حسب قدرتي انى ادي لشغلى
السؤال الرابع عشر : ليه شايف نفسك مناسب للوظيفة ؟
اتكلم عن مهاراتك وخبرتك
السؤال الخامس عشر :ايه اهم بالنسبالك الشغل ولا الفلوس ؟.
( شوف الاجابة النموذجية ) الفلوس مهمة طبعا بس الشغل اهم
السؤال السادس عشر : تقدر تشتغل تحت ضغط كبير ؟
فعلا , اعرف انجز اكتر تحت ضغوطات معينة ( ولو حصل معاك فعلا تقول مثال) ودا حسب نوع الشغل ,
(متهيالي كلنا ضغط الامتحانات بيخلينا نذاكر ولا ايه اساسا مش بنذاكر الا علشان عندنا امتحان )
السؤال السابع عشر : مهاراتك وخبرتك متناسبة اكتر مع الوظيفة دي ولا وظيفة تانية ؟
والاجابة طبعا الوظيفة دي اكتر
لو شايف فعلا ان مهارتك متناسبة اكتر مع وظيفة تانية , بلاش تلمح للموضوع من بعيد أو قريب
السؤال الثامن عشر : اي موقع يناسبك اكتر لو بتشتغل ضمن جروب ؟
شوف انسب موقع فعلا تعرف تشتغل فيه
السؤال التاسع عشر : اكتر مشكلة واجهتك سببت لك احباط في العمل ؟
حاول تكون ايجابي وعندك روح رياضية وانك بتتقبل كل الامور بس حاول تبين ا ن دا بيحصل بس لما يكون الموضوع خارج عن سيطرتك وخارج نطاق صلاحياتك
السؤال العشرين : اكتر وقت ممتع بالنسبالك اثناء العمل ؟
لما احس اني عملت انجاز مهم للشركة اللي بشتغل فيها ( ياريت بجد كل الناس يكون عندها التفاني دا )
تحياتي لكم
